2009.08.07-08-Баасан –Бямба гараг буюу төгсгөл

Гэртээ яарсан сэтгэл минь... Ямар бороошиж дуусдаггүй тэнгэр вэ...Товч бөгөөд тодорхой өгүүлбээс өглөө Мэргэний гэр буудалтай тооцоогоо хийж завиар Хатгал хүргүүлээд тэндээсээ замын пургонд тус бүр 4000 төгрөг төлж шавар шавхай нялцгануулсаар явж Мөрөн ороод, тэндээс оройн 8 цагт Мөрөнгийн тээврийн товчооноос 2 ээлжийн жолоочтой хот орох пургонд нэг хүний гучин мянгыг өгч суугаад тасралтгүй довтолгосоор хагас сайны өглөө 8 цагт гэртээ ирлээ. Мөрөнгийн захаас пургоны хатираан дунд худалдаж авсан хадгалагч бодис нэмээгүй жинхэнэ байгалийн ориг нэрс идэж, усанд орж тансаглав. Сиймхий ч бол гэр минь гэж гэртээ ирэх сайхан байна аа. Маргааш амраад нэг дэхэд ажилдаа орно...Бөөн бөөн дурсамж, танилцаад удаагүй ч дотно санагдах шинэ танилууд, хоёр мянга хол илүү зураг үлдлээ дээ.

Төгсгөл

Зиак, энэ хүрээд Алтайн тэмдэглэл маань өндөрлөж байна. Энэ хугацаанд надтай хамт байж, чадан ядан эвлүүлсэн тэмдэглэлийг минь үнэт цагаасаа хомслон байж уншсан, урам өгч байсан уншигчдадаа баярлалаа. Сүүлийн хэдэн бичлэг жаахан яаруу, тааруу болсныг уучилна уу. Учир юу вэ гэвэл, дараагийн аялалын тов гараад түүндээ хамаг сэтгэл санаа явчихаад, хоёрт гэвэл аялснаас хойш даруй долоо найман сар өнгөрөөд миний уйдамхай зан хөдөлж эхэлж байсан үеийх шигээ шинэ соргог байж чадсангүй ээ.

Ажиглаад байхад тэмдэглэлийг маань аялах дуртай хүмүүс уншдаг бололтой юм. Анхнаасаа блогийн маань зорилго хүмүүст аялах сэдэл төрүүлэх, аялах гэж байгаад нь хэрэгтэй мэдээлэл өгөх явдал байсан тул өөрийн туршлагад үндэслэсэн, хэрэг болж болзошгүй хэдэн үгийг эцэст нь хэльюү гэж бодлоо.

Юуны өмнө, дан ганц аялах хүсэл хангалтгүй. Мөнгө цаг хоёроо сайтар төлөвлөвөөс хандах зүг аяндаа тогтоно. Миний хувьд аялалын оршил хавьд өгүүлж байсанчлан аль 2007 онд гэртээ хүүхдээ хараад сууж байхад МНТВ-ийн Бадамсамбуугийн баруун этгээдэд зорчсон нэвтрүүлгүүдийг үзээд үнэхээр хорхой хүрсэн билээ. Ингээд сар бүрийн цалингаасаа 2 удаа тогтмол хэмжээний мөнгийг хадгаламжийн данс руугаа VISA картны данснаас автоматаар шилжүүлэх даалгаврыг харилцагч банкандаа гардуулснаар 2009 онд аялах бололцоо бүрдсэн юм. Хаа байсан 2 жил гэж шантрах хэрэггүй. Одоо бодоход хол мэт байвч, өнгөрсөн хойно нь цаг хугацаа харвасан сум шиг гэж бид гайхацгаадаг биз дээ. Ухаандаа урьдчилгаа цалингаасаа 25 мянга, сүүл цалингаасаа мөн 25 мянгыг хадгалаад байхад таны амьдралд ноцтой сүйрэл учрахгүй байх гэж найдна. Ингээд та нэг жилийн дараа 600 мянга, 2 жилийн дараа сая хоёр зуун мянгатай боллоо. Банкны хүү гэж бас хөөрхөн мөнгө бодогдоно. Өөртөө итгэлгүй, үрчих байх гэж бодож байвал хатуу нөхцөлтэй, хүү өндөртэй хүүхдийн хадгаламж нээчих. Тэгээд яг цалин буудаг 2 өдрөө таны данснаас 25 мянгыг шууд татаж авах хүсэлтээ банкандаа өгчихөд гар дээрх мөнгө анхнаасаа л тийм байсан шиг санагдаад ер харамсахгүй. Заавал онгоц энэ тэр гэхгүй бол энэ мөнгө баруун аймгаар аялахад нэг хүнд хангалттай. Таны цалин арай ахиу бол энэ дүнг 2 дахин ихэсгэж хугацаагаа 2 дахин багасгах бас нэг зам байна. Яг өнөөдрөөс эхэлбэл та ирэх жилийн өдийд үүргэвчээ үүрээд замд гарах боломжтой.

Ийм маягаар хуримтлуулсан мөнгийг яг аялалын хэрэгцээнд зориулж үрэх үнэхээрийн урамтай. Газраас боодол мөнгө олсонтой л адил санагдана даа. Бас өдий хүртэл үрчихэлгүй тэвчиж чадсандаа та өөрөөрөө бахархаж, болдог юм байна гэсэн гүн бат итгэл үнэмшилтэй болно.

Цаг завын хувьд бол эртнээс энэ жил төдөн сард би ингэнэ шүү гээд эртнээс зарлачих хэрэгтэй. Хүн болгонд та явах л ёстой байсан шиг санагдана. Гол нь ажлаа алдчихгүй байх, мөн цаг агаар таатай байх үеийг сонгохоо хэлүүлэлтгүй мэдэж байгаа буй заа.

За ёс мэддэгүй хүнд бол ёр халдахгүй гэлээ ч дараагийн нэг зүйл бол зүг чигээ асууж, аян замын ерөөлөө авахуулаад гарахад ер гэмгүй. Нэг ёсондоо итгэдэг хүндээ бол даатгалын компанитай энергийн түвшинд гэрээ хийчихэж байгаатай адил. Урд явж үзээгүй газар орон руу явах гэж байгаа улс бол ялангуяа анхаарууштай. Тоохгүй яваад үнэн худал нь мэдэгдэхгүй осол аваарт орсон улсын тухай яриаг зөндөө л дуулаа байлгүй. Миний хувьд хэдийгээр Ховд тур гэж компанид голгүй хулхидуулсан боловч сайн хүмүүстэй таарч, элдэв муу явдалтай таараагүйгээ зам мөрөө асууж гарсных гэж бодоод байгаа.

Хамгийн сүүлд хэлэхэд “Хамаг бүгд бороо шиг арилж, харин гэрэл зураг шороо мэт үлдьюү ” гэдэгчлэн хээр гадаа байгалийн сайханд явахад янзтай зураг зөндөө авдаг. Гол анхаарууштай зүйл бол аппарат, камерны батарей дуусах явдал. Тог цахилгаангүй газраар олон хоног явган аялбал нэмэлт батарей заавал аваарай. Мөн нягтшил ихтэй зураг зай их эзэлснээс санах ой бас дүүрэх тал бийг санаарай.

За ингээд дараагийн шинэ ТӨВДИЙН ТЭМДЭГЛЭЛээр уулзатлаа түр баяртай. Та монголын сайхан орноороо заавал аялаарай. Танд амжилт хүсье.